BÈN-VENGUDO !

O, siegues li bèn-vengu ! 
« Vaqui l'aubo que moun amo esperavo pèr s'escarrabiha. » Uno fraso escricho pèr Frederi Mistral dins soun obro que soun titre es Memòri & Raconte. Quàuqui mot ispira au Mèstre de Maiano pèr  "Li Dous Agnèu",  "Pauloun",  "Lou Paure",  "Louisetoe d'àutri perlo pouetico manlevado de Li Margarideto, lou proumié libre nascu dins l'esperit de Jóusè Roumaniho qu'èro soun einat de douge an. Se saup, pièi, l'amista que i'aguè entre li dous Primadié pendènt mai de cinquanto an.

 « Vaqui l’aubo… » es tambèn li mot qu'auriéu ama escriéure quand descurbiguère  – d'un biais tardié, lou counfesse voulountié -,  la literaturo e la pouësìo prouvençalo, pièi aquelo de lengo d'O. Dins nosto soucieta destimbourlado mounte cadun bat sa marcho, me siéu enventa un mounde, uno "Arcadìo". Aqui, pode legi e tourna legi d'obro felibrenco : de-segur, Frederi Mistral, Jóusè Roumaniho, Folcò de Baroncelli, Jóusè d'Arbaud, Teoudore Aubanèu, etc. Fau óublida touto la generacioun d'escrivan atuau : Michèu Courty, Felipe Blanchet, Glaude Mauron, etc. Souvènti fes, me dise que pèr agué councèupu  d'obro tant galanto, fau èstre en estat de gràci. Coume lou fuguèron tambèn tóuti lis escrivan de lengo d'O (au singulié) : Mas Rouqueto, Jan Lafont, Jan Boudou, Louïsa Paulin, Marcelo Delpastre, Miquèu Camelat e mai proche de nautre, Felip Gardy, Felip Martel, Jan-Frederi Brun, Jan-Glaude Forêt Flourian Vernet... Fau faire rèire dins lou tèms pèr ana au rescontre de Pey de Garros, Bertrand Larade, Bellaud de la Bellaudiero, Pèire Goudoulin, Ismaël Despuech, Du Bartas,... Un tiero de pouèto e d'escrivan de lengo d'O que n'en vesèn pas jamai la fin...

Au moumen de la neissènço d'aquéu mouvamen, es bono-di acò que sian aqui vuei, lou jouine Mistral saupeguè revira en vers li sentimen dóu cor que ié murmurè à l'auriho sa muso prouvençalo. Emé sa souleto plumo, lou Cap de la troupo rebello a sachu vesti emé de bèlli flour blanco aquelo lengo mespresado en ié baiant uno obro magistralo, universalo e eternalo : Mirèio.

Uno cadeno de televisioun, uno web-tv, afin de miés faire l'unioun carnalo entre l’image e li tradicioun, e subre-tout nosto lengo maternalo. Uno televisioun pèr parteja, pèr apara, pèr manteni e desvouloupa nòsti coustumo. Emé d'en proumié lou Felibrige e sa galanto Rèino Angelico, mai tambèn emé la graciouso Rèino d'Arle, l'Antico Counfrarié de Sant-Jòrgi que festejè soun anniversàri cinq centen en 2012, la Nacioun Gardiano, eiretage lega pèr Folcò de Baroncelli, Marqués de Javon, la Counfrarié di Sànti-Marìo-de-la-Mar que celebrè si sèt siècle d'eisistènço en 2015, li parla locau, lou coustume, li manado, la bouvino e la roussatino emé nòsti biòu e nòsti chivau camargo, sènso óublida lis atour de la culturo prouvençalo - escrivan, pouèto, artisto de touto meno - e tóuti aquéli qu'obron en favour de la Causo...

Tout acò pèr ounoura la memòri de nòsti davancié, pèr metre nòsti pas dins si piado, tèsto nauto e sènso fali. Afin que nòsti coustumo anon pas jamai s'avali dins lou Demembrié. Pèr-ço-que enco nostre, i'a un mot mai fort que l'amour : l'afecioun... 

Pèr la voutacioun çai-souto, lou fau faire sus lou site en francés.
Felipe Reig
Mèstre d'Obro dóu Felibrige

DARRIER APOUNDOUN

22 de Setèmbre 2016 : coumençanço dóu site...

VOTRE SATISFACTION

Votre site est :